Поэт, суруналыыс, кыраайы үөрэтээччи,  Россия географическай уопсастыбатын чилиэнэ, Айылҕа харыстабылын туйгуна, СР култууратын үтүөлээх үлэһитэ,  1999 с. СР Суруйааччыларын союһун чилиэнэ, “Гражданскай килбиэн” бэлиэ хаһаайына.

Иванов Иван Еремеевич – Уйбаан Ороһуунускай 1945 с. атырдьах ыйын 9 күнүгэр Үөһээ Бүлүү улууһугар Ороһу нэһилиэгэр төрөөбүтэ. Оҕо сааһа «Кустук» холкуоска Дьаархан диэн алааска ааспыта. Кини төрдүс кылааска үөрэнэр сылларыттан хоһоону суруйууга холоммут, ол курдук «Маай» диэн аан маҥнайгы хоһооно «Бэлэм буол» хаһыакка тахсыбыта. 1963 с. Ваня Иванов көхтөөх юнкор быһыыттынан «Бэлэм буол» анал бирииһинэн – «Смена» фотоаппаратынан бириэмийэлэнэн турар. Суруйар талааннаах уол республиканскай конкурска «Хоннохтоох хотуурдаах уолаттар» диэн ыстатыйаннан кыттан, 3-с миэстэни ылбыта. «Костер»  сурунаал биллэрбит Бүтүн Сойуустааҕы уус-уран аймньы конкурсугар «Хаптаҕастыы сылдьан хаптарбыт»  диэн кэпсээнинэн кыттан 1 миэстэни ылан, «Орленок» лааҕырга баран сынньаммыттаах.

И.И.Аргунова «Поэзия аартыгын сандаарда» библиографическай ыйынньыгар (Үөһээ Бүлүү, 2005) суруйарынан, И.Е.Иванов- Ороһунускай – 41 кинигэ ааптара, ырыанньык бэйиэт быһыытынан 171 хоһооно ыллам ырыа буолан көппүт эбит. «Кэрэчээнэ», «Сахаайа», «Алгыстаах ырыалар»  диэн ырыанььыктар ааптардара. Маны таһынан оҕолорго анаан тэттик кэпсээннэри суруйара. Публистика жанрыгар Аҕа дойду Улуу сэриитин уонна айылҕа харыстабылын тиэмэлэригэр күүскэ үлэлээбитэ.