Биир дойдулаахпыт Норуоттар Доҕордоһуулара, Бочуот Знага, Үлэ Кыһыл Знамята орден кавалера, бөдөҥ общественнай диэйэтэл, саха норуодунай суруйааччыта Н.Г.Золотарев-Николай Якутскай төрөөбүтэ 115 сылыгар анаан олус элбэх тэрээһиннэр буоллулар. Олортон биир истиҥнэрэ – “Олох оскуолата” айымньытынан тэттик киинэ.
Бу киинэ сэрийээл курдук ньыманан уһуллууну Ороһутааҕы норуодунай тыйаатыр, модельнай библиотека уонна “Иэйиэхсит” оҕо түмсүүтэ оҥорбут. Тэттик киинэлэр иккис сезонугар Харбалаах оскуолатын үөрэнээччилэрин ыҥыртаан уһуллубут сиэрийэлэрин биһирэмэ буолла. Саас-сааһынан кэпсээтэххэ маннык.
Ороһутааҕы модельнай библиотека сэбиэдиссэйэ Жанна Семеновна Иванова оҕо сылдьан Николай Якутскай бу кинигэтин олус сэҥээрэ истибит да, аахпыт да. Кэлин улаатан, үлэһит буолан бу айымньыны арай киинэ гыныым диэн санаа үөскээбит. Олоххо киллэрэн тус бэйэтэ сынаарый суруйан, устан тэттик киинэ оҥортообут.
Сүрүн дьоруойдарынан олохтоох норуодунай тыйаатыр артыыстара Романов Петр Романович, Туралысова Екатерина Алексеевна уонна 6 кылаас үөрэнээччитэ Сергей Исаков оонньообуттар.
Киинэҕэ “Иэйиэхсит” оҕо бөлөҕүн (сал.Михайлова Нина Никитична) кыргыттара олус үчүгэйдик уруһуйдаан, хамсанар куукулаларынан кытта киинэ биир түһүмэҕин оҥорбуттар.
Кыракый Быытык (Николай Якутскай таптал аата) Харбалаах оҕолоро оскуолаҕа үөрэнэ сылдьар, ойуурга бултуур түгэнигэр, учууталынан 10 кылаас үөрэнээччитэ Алмаз Николаев уһулуннулар. Киинэ балаҕаҥҥа, ойуурга, суруйааччы төрөөбүт Дөлөкөйүгэр уһуллубут. Саас, күһүн, кыһын курдук дьыл кэмин барытын хаппыттар. Сюжеттар тэтимнээхтэр, иитэр-үөрэтэр түгэннэрдээх. Тыаһа-ууһа олус табыллыбыт.
Киинэ биһирэмэ суруйааччы төрөөбүт сиригэр Ороһуттан айаннаан кэлэн ыыттылар. Төрөппүттэр уолаттар уһуллубуттарыттан, төрөппүт Кузьмин Ибрагим Ильич массыынатынан тиэйэн илдьибитин олус үөрэн, астынан туран махталларын биллэрдилэр. Киинэ олус үчүгэйдик оҥоһуллубутун, сүрүн дьоруой Сергей Исаковтан оруолун бэркэ арыйбытыттан сөхтүлэр-махтайдылар. Киинэ Дьүкээбил уол Дьыл оҕуһун кытта охсуһар сюжетыгар оҕолор бэри бэркэ уруһуйдаабыттарын бэлиэтии көрбүттэрин эттилэр. Уонна өссө да ыҥыра тураарыҥ диэн баҕа санааларын эттилэр.
Маны таһынан “Олох оскуолата” тэттик киинэни көрбүт ыҥырыылаах ыалдьыттар сүрүн оруолу оонньообут Сергейи олус хайҕаатылар. Инникитин да бу курдук истиҥник оонньуу турарыгар баҕардылар. Түмүккэ Николай Якутскайы билиигэ, араас остуол оонньууларыгар күрэхтэһии буолла.
Дьэ ити курдук биир дойдулаахпыт туһунан үгүс тэрээһиннэртэн биир олус сыралаах, ол гынан баран түмүктэн дуоһуйууну ылар тэттик киинэлэри устуу үлэтин биһирэмэ итинник ааста.
Исидор Барахов аатынан
судаарыстыбаннай түмэл исписэлииһэ,
СӨ култууратын туйгуна
Семенова Евдокия Павловна.
