Муус устар 9 күнүгэр Уйбаан Ороһуунускай аатынан Ороһутааҕы библиотекаҕа “Оҕону кыра эрдэҕиттэн ааҕыыга уһуйуу” диэн төрөппүттэргэ аналлаах төгүрүк остуол буолан ааста. Төгүрүк остуолга оҕону иитиигэ бэйэлэрин көрүүлэрин уонна уопуттарын атастастылар:
Иванова Надежда Михайловна үрдүк стажтаах уһуйаан иитээччитэ, педагог-психолог оҕону отой кыра сааһыттан тас эйгэни билэ-көрө улаатарыгар, тыла сайдарыгар анаан араас лотолары, остуол оонньуутун туһаныахтаахпыт туһунан эттэ. Ону тэҥэ төрөппүттэргэ олус интэриэһинэй ис хоһоонноох тренинг ыытта.
Васильева Сардаана Николаевна – Ороһу орто оскуолатын нуучча тылыгар уонна литературатыгар үрдүк категориялаах учуутала оҕону иитиигэ остуоруйа сүрүн кылаатын туһунан умсугутуулаахтык кэпсээтэ. Остуоруйа төрөппүт уонна оҕо күннээҕи алтыһыытыгар улахан оруолу оонньуурун умнуо суохтаахпыт.
Егорова Александра Ивановна – Ороһу орто оскуолатын уонна уһуйаанын логопед-специалиһа. Оҕо саҥа тылланарыгар дорҕоону сөптөөхтүк аттаран саҥарарын ситиһэргэ олус интэриэһинэй мастер-класс биэрдэ. Борустуой ватнай палочка, соломка-бичиэнньэ уонна булугас өй көмөтүнэн оҕолорбут дорҕоону сөпкө саҥаралларын ситиһиэхпитин сөп эбит.
Кэлбит төрөппүттэр библиотекаҕа саҥа кэлбит оҕо кинигэлэрин, периодическай таһаарыылары, саҥа быыстапкалары сэргии көрдүлэр. Ону тэҥэ библиотека оҕолорго аналлаах залатын, интерактивнай муннугун кытары билистилэр.
Түмүгэр төрөппүттэр итии чэйдээх остуол тула оҕо иитиитигэр бэйэлэрин санааларын, уопуттарын атастастылар.
Субу курдук биир өрөбүл күн олус таһаарыылаахтык, туһалаахтык ааста. Аныгыскыга библиотекаҕа ыытыллар тэрээһиннэргэ бука диэн көхтөөх кыттыыны ылаарыҥ диэн ыҥырабыт!
