«Ороһу эбэтэ» диэтэхтэринэ харахпар халаан уутунан тобус толору туолбут күөл кытыытыгар оҕо-аймах оонньоон көччүйэ сылдьар түптэ сытынан тунаарбыт уу-нуурал ыам ыйын киэһэтэ харахпар көстөр. Бука диэн миэхэ эрэ буолбатаҕа буолуо Ороһу буорун сыгынньах атаҕынан үктээн оҕо сааһа ааспыт дьоҥҥо барытыгар буолуо.
Поэт, журналист, кыраайы үөрэтээччи Иван Еремеевич Иванов – Уйбаан Ороһуунускай Ороһутун сирин-дойдутун, дьонун-сэргэтин хоһуйбут патриот поэт буолар. Чахчы да кэнэҕэски ыччакка дойдутунан киэн туттууну угуйар ис-хоһоонноох айымньылардаах.
Ахсынньы 13 күнүгэр Гаврил Николаев аатынан сынньалаҥ киинигэр Уйбаан Ороһуунускай тылларыгар, Егор Неустроев-Тулуйхан мелодиятыгар «Ороһу эбэбэр» ырыа килиибэ сүрэхтэннэ. Бу үөрүүлээх күҥҥэ, Ороһу олохтоохторун кытта үөрүүлэрин тэҥҥэ үллэстээри Светлана Александровна уонна Егор Ильич бэйэлэрэ кэлэн иилээн-саҕалаан «Тулуйхан» вокальнай ансамбль кэнсиэрэ биир тыынынан ааста. Россияҕа дьиэ кэргэн, Сахабыт сиригэр оҕо саас сылларыгар оруобуна анаабыт курдук бэртээхэй тэрээһин буолла.
Ороһу орто оскуолатын дириэктэри иитэр үлэҕэ солбуйааччы Татьяна Гаврильевна Кысылбаикова субу курдук кэпсиир: «Светлана Александровна, Егор Ильич Ороһуга 2011 сыллаахтан филиал арыйан үлэлэттилэр. Кинилэр республикаҕа элбэх улууска филиаллаахтар. Ол филиалларыгар дойдуларын туһунан ырыа үөрэтэллэрин таһынан клип устуута – үлэлэрин биир уратыта буолар. Егор Ильич «Ороһу эбэбэр» ырыаны 2014 сыллаахха суруйан лааҕыр оҕолоругар үөрэппитэ. Быйыл сайын лааҕыр кэмигэр 24 оҕолоох килиип уһулунна. Видеограф Ярков, режиссер Анна Васильевна Семенова .
Бу лааҕырга сылдьан оҕолор музыка, ырыа суолунан идэлэрин талан үөрэнэ сылдьаллар. 2013 сыллаахха лааҕыр оҕолоро Москваҕа международнай конкурска баран лауреат үрдүк аатын ылан кэлбиттэрэ.
Килиип сүрэхтэниитигэр 18 ырыа ылланна. Быйылгы репертуарга Христофор Максимов мелодиятыгар “Эйэ, дьол холууба», «Аҕабытын таптыыбыт», ырыалар. «Дьоллоох дьиэ кэргэн» диэн саҥа ырыаны икки эдэр ыал ийэлэрэ оҕолорунаан толордулар. «Тулуйхан» лааҕырга 2014-2015 сылларга сылдьыбыт , билигин Ороһу оскуолатыгар музыка учууталынан үлэлиир Наайа Ньуур ыллаата.
Бу клип уһуллар кэмигэр өҥүрүк куйааһы,кумаары тулуйан оҕолор бэркэ уһулуннулар. Клип билиҥҥи тыа сирин оҕотун, кылгас сайыҥҥы кэм үөрүүлээх түгэннэрин, дьарыктарын көрдөрөр чаҕылхай түгэннэрдээх. Маннык клип чочуллан оҥоһуллан тахсыбытыгар Ороһу дьоно-сэргэтэ Егор Ильичкэ, Светлана Александровнаҕа барҕа махталларын аныыллар».
Иван Еремеевич Иванов кыыһа, СӨ бэчээтин туйгуна Гуннара Ивановна Байгильдина – Ороһуунускайа: «Күндү биир дойдулаахтарбын, талааннаах ырыаһыт оҕолору “Ороһу Эбэбэр” клип сүрэхтэниитинэн истиҥник эҕэрдэлиибин! Аҕам төрөөбүт дойдутун Ороһуну олус сөбүлүүрэ, элбэх ырыа-хоһоон айбыта, айар үлэтин быыһыгар күүс-сэниэ, иэйии ыла тиийэрэ. Үтүө дьонун-сэргэтин ахтара, сүрэҕэ курдаттыы тарда турара. Ырыа музыкатын айбыт саха композитора Егор Ильич Неустроевтыын, Светлана Александровналыын билсэллэрэ, өйөнсөллөрө. Егор Ильич кэргэнинээн оҕо сааһы киэргэтэн, “Тулуйхан” вокальнай ансаамбылы улуустарга тэрийэллэриттэн бары да астынабыт. Бу ырыа төрөөбүт дойдунан киэн туттууну өрүү да үөскэтэ, кэрэ иэйиини уһугуннара, кэскиллээх Ороһу талааннарын таһаара турарыгар баҕарабыт ! Аҕабыт эһиил 80 сааһын туоларыгар бэртээхэй бэлэх буолбутунан барыгытын эҕэрдэлиибин!» диэн баҕа санаатын тиэртэ.
Саҥа сүрэхтэммит килииби Ороһу дьоно-сэргэтэ көрөн бары да сүргэбит көтөҕүлүннэ. Айылҕалыын, дьоннуун-сэргэлиин мааны түөлбэҕэ олорор эбиппит диэн санаа сылааһынан илгийдэ. Бу киэһэни киэргэппит Светлана, Егор Неустроевтарга, оҕолорго эҕэрдэ тыл үтүөтэ, махтал тыл мааныта ананна.
