Ахсынньы 12 күнүгэр , Гаврил Николаев аатынан сынньалаҥ киин ,Уйбаан-Ороһуунускай аатынан Ороһутааҕы модельнай библиотека көҕүлээһининэн Күбэйэ түмсүү ” Эбээ үөрэҕэ”, өбүгэлэрбит өлбөт -сүппэт үтүө үгэстэрин, аар айылҕа кистэлэҥнэрин билиһиннэрэр,иитэр үөрэтэр бырайыак чэрчитинэн олус интириэһинэй ,туһалаах тэрээһин буолан ааста
Бүгүҥҥү сэргэх тэрээһиммитигэр «КҮБЭЙЭ» түмсүү тэрийээччитэ Власьева Ксения Самсоновна Ороһу орто оскуолатын улахан кылаас үөрэнээччилэригэр Ороһубут дириҥ историятын билиһиннэрдэ,өбүгэлэрбит олохторун-дьаһахтарын туһунан сырдатта.

90-с.с. бүтүүлэригэр Ксения Самсоновна уонна Нина Никитична «Эбээ үөрэҕэ» сайыҥҥы лааҕыры бэрт айымньылаахтык, таһаарыылаахтык салайан үлэлэппиттэрэ. Оччолорго эбээ, эһээ уһуйуута диэн уопсастыбаннаска сонун этэ. Наука доктора Виктор Данилович Михайлов бу сонун бырайыагы истэ сэргээн «Эбээ үөрэҕэ» маҥнайгы кинигэни ЯГУ типографиятыгар буор-босхо бэчээттэтэн биэрбит. Онтон кынаттанан «Эбээ үөрэҕэ» иккис чааһа уонна «Сиэммэр сэһэргиибин» кинигэлэр утуу-субуу күн сирин көртөрө. Бу ахтыы кинигэлэрэ ыччат дьон эһээлэрин, эбээлэрин урукку олохторун билэ улааталларыгар, чинчийэр үлэлэригэр олус наадалаах, күндү матырыйаал буолар.

Нина Никитична Михайлова хайдах «ИЭЙЭХСИТ» түмсүүтүн тэрийэн бу баччааҥҥа диэри салайан, оҕолору сырдыкка, кэрэҕэ угуйарын туһунан олус интириэһинэйдик кэпсээтэ. Ону тэҥэ Анна Степановна Ласточкина, Сардаана Владимировна Васильева бэйэлэрин олоххо көрүүлэрин кэпсээн ,санаа атастаһан олус умсугутуулаах көрсүһүү буолла.
Оскуола оҕолоро санаа атастаһан тыл этиннилэр, бэрткэ сэргээн иһиттилэр!
Бу курдук истиҥ,сэргэх,туһалаах көрсүһүүлэр нэһилиэкпитигэр инникитин буола турдуннар диэн баҕа санаалаахпыт ! Тэрээһиммит кыттааччыларыгар барҕа махтал!

Ньургуйаана Ноговицына