Мэхээлэ Бөтүрүөбүс Өлөксөөйөп – Дапсы — биллиилээх саха лиҥкибииһэ, тыл үөрэҕин хандьыдаата, «Биһирэм тыл» араадьыйа биэриитин ааптара. Саха тыла ыраас, туруктаах буоларыгар элбэх сыратын биэрбит киэн туттар биир дойдулаахпыт.

Үөһээ Бүлүүтээҕи О.Д. Федорова аатынан киин модельнай библиотека көҕүлээһининэн 2022 сылтан сэтинньи 6 күнэ, Мэхээлэ Бөтүрүөбүс күн сирин көрбүт күнэ, улуус үрдүнэн “Биһирэм тыл күнүнэн” биллэриллибитэ. Бу күн улуус үрдүнэн “Дапсы дьыктаанын” суруйуу үтүө үгэскэ кубулуйда.

Быйыл үһүс төгүлүн ыытыллар “Дапсы дьыктаанын” тиэкиһэ профессор, педагогическай билим хандьыдаата, СӨ норуот үөрэҕириитин туйгуна, СӨ үрдүк идэтийбит үөрэҕирии туйгуна, СӨ култууратын туйгуна Попова Галина Семеновна-Санаайа “Үрүҥ кэрэ сырдыга” суруйуутун, киин библиотека кыраайы үөрэтэр салаата бэркэ диэн талан тарҕаттылар.

Ороһу нэһилиэгин Уйбаан Ороһуунускай аатынан библиотеката туора турбакка аахсыйаҕа кыттыстыбыт. Дьыктааҥҥа олохтоох дьаһалта, музей, сынньалаҥ киинин үлэһиттэрэ, ону тэҥэ “Күбэйэ” эбээлэр түмсүүлэрэ кыттыыны ыллылар. Бастыҥнар ахсааннарыгар К.С. Чиряев аатынан этнопедагогика киинин дириэктэрэ Васильева Р.А., олохтоох дьаһалта социальнай үлэһитэ Яковлева З.В., баһылыгы солбуйааччы Ильина А.К., тех үлэһит Хобуева В.И., бухгалтер Терентьева Т.Н., “Күбэйэ” түмсүүттэн Малахаева Е.Н. буоллулар.

Быйыл улуус үрдүнэн 261 киһи кытынна. Сыл ахсын бу үтүө тэрээһин үгүс сүгүрүүйээчилэри бэйэтин тула түмэ турарыгар баҕарыаҕыҥ. Сахабыт тыла күннэтэ үүнэ-сайда, сириэдийэ турдун!