Ырыаҕа ылланарыныы “аалай уоттаах” хомсомуол сулуһа бүттүүн дойдубут ыччатын сирдьит сулуһа буолбута. Аҕа дойду уоттаах сэриитин кэннэ дойдуну ыччат дьон тигинэччи үлэлээн-хамнаан чөлүгэр түһэрбиттэрэ, үөрэххэ-үлэҕэ үгүс сайдыыны аҕалбыттара.

Оччотооҕу эдэр саас кэрэ кэмнэрин ахтан-санаан ааһаары “Күбэйэ” Ороһутааҕы эбээлэр түмсүүлэрэ (сал. Котоконова Н.В.) Уйбаан Ороһуунускай аатынан Ороһутааҕы библиотекаҕа ахтыы киэһэтин уонна факеллаах хаамыыны тэрийдилэр. Таһырдьа төһө да тымныы буолбутун иһин онтон чаҕыйбакка, сүрэхтэригэр эдэр саас төлөнө сылааһынан сыдьаайан факел тутан түөлбэни эргийэн кэллилэр. Онтон дьэ, күө-дьаа, библиотека сылаас эркинигэр итии үүттээх чэй иһэ-иһэ урукку кэми ахтан сэргэхсийдилэр.