Улууспут дьаһалтатын уонна Үөһээ Бүлүүтээҕи кииннэммит библиотечнай ситим көҕүлээһиннэринэн хас вторник аайы улууспутугар “Доруобуйа күнүнэн” биллэрилиннэ. Балаҕан ыйын 10 күнүттэн саҕалаан хас биирдии коллектив, нэһилиэктэр бука бары чэбдигириигэ аналлаах тэрээһиннэри ыыталлара күүтүллэр.

Биһиги Ороһубут нэһилиэгэр улуус ыҥырыытын өйөөн оскуолабыт директора Никонов Прокопий Устинович уонна директоры иитэр үлэҕэ солбуйааччы Кысылбаикова Татьяна Гаврильевна көҕүлээһиннэринэн киэн туттар биир дойдулаахпыт, XXXIII Аан дойдутааҕы олимпийскай оонньуу кыттыылааҕа, сүүрүк Сардаана Трофимова ыалдьыттаата.

Тэрээһиҥҥэ уһуйаан, оскуола оҕолоро уонна олохтоох общественность, тэрилтэ үлэһиттэрэ көхтөөх кыттыыны ыллылар. Бастатан туран Сардаана Александровна эти-хааны чэбдигирдэр зарядка оҥоттордо. Кыралыын улаханныын бука бары эрчимнээх музыка доҕуһуолугар хамсанныбыт. Салгыы оскуола директора Прокопий Устинович эҕэрдэ сурук уонна оскуола коллективын аатыттан бэлэх, сибэкки дьөрбөтө туттарда. “Ороһу нэһилигэ” МТ баһылыгын солбуйааччы Ильина Анастасия Капитоновна, үгүс оҕону спорт эйгэтигэр уһуйбут Ороһу нэһилиэгин киэн туттар дьоно Кысылбаиков Игнат Гаврильевич, Романова Калиста Ивановна эҕэрдэ тыл эттилэр.

Сардаана Александровна ыаллыы сытар Тамалакаан нэһилиэгиттэн төрүттээх. Спорт ветерана Калиста Ивановна Романова кини олипийскай чыпчаалы дабайарыгар улахан олугу уурбута уонна бу үөрүүлээх тэрээһиҥҥитигэр ыалдьыт быһыытынан ыҥырбыккытыгар махтанабын диэбитин олус диэн уйадыйа иһиттибит.

Субу курдук өрө күүрүүлээхтик уонна көхтөөхтүк “Доруобуйа күнэ” арыллыыта Ороһу нэһилиэгэр бүгүн буолан ааста. Сиһилии видео-сюжетка көрүөххүтүн сөп.