Ахсынньы 15 күнүгэр Ороһуга Үөһээ Бүлүү нэһиэктэрин оҕолоро алыптаах остуоруйа киэһэтин бэлэхтээтилэр…

Кыыдам кыһын кэлиитэ, кырыа хаар тымныы тыынын биллэрэр кэмигэр, үрүҥ күммүт кылгаан, түүммүт уһаан, саха барахсан киэһэтин ахсын тигиниччи оттуллубут оһоҕун таһыгар оллоонноон олорон олоҥхолуур, остуоруйалыыр дьоро киэһэлэрэ үксүүр… Бу өбүгэбит мындыр үгэһин үйэтитэр санааттан, Ороһутааҕы “Иэйиэхсит” оҕо студиятын салайааччыта, Михайлова Нина Никитична айбыт бырайыагынан, Ороһутааҕы сынньалаҥ киинин салайааччыта, Иванова Анна Артуровна көҕүлээһининэн, былырыыҥҥаттан, кэлэр кэскилгэ остуоруйа алыптаах, үөрэтэр-такайар эйгэтин арыйар “Оллоонноон олорон остуоруйалыах…” диэн улуустааҕы фестиваль иккис төгүлүн Ороһу нэһилиэгэр ситиһиилээхтик тэриллэн түмүктэннэ.

Быйыл Оҥхой, Хоро, Дүллүкү, Ороһу орто оскуолаларын үөрэнээччилэрэ, театральнай студиялар иитиллээчилэрэ, араас омук остуоруйатын сахалыы тылбаастаан спектакль туруоруутугар уонна көрдөрүүтүгэр күөн көрүстүлэр. Оҕолор аһаҕастара, үөрүнньэҥнэрэ, чэпчэкилэрэ, остуоруйа ис хоһоонун оруолга киирэн тиэрдэллэрэ киһини сөхтөрөр.
Кылаан кындыл кыайааччыннан уонна 10.000 солк. сертификатынан, көһө сылдьар кубогунан наҕараадаланна, жюри биир тыынынан быһааран, Оҥхой нэһилиэгиттэн “Кэскиллэр” театральнай студия, Шарль Перро “Кыһыл бэргэһэчээн” остуоруйата, салайааччы Васильева Мария Гаврильевна. Онон, эһиил ыытыллар фестиваль хаһаайыттарын аатын Оҥхой нэһилиэгэ сүктэ.

Кыайыылаах бастакы миэстэни уонна 7.000 сертификатынан биһирэннэ Ороһутааҕы “Иэйиэхсит” оҕо студиятын иитиллээччилэрэ, “Бөтүүкчээн”, нуучча норуот остуоруйата, салайааччы Михайлова Нина Никитична, туруорааччы Акимова Розалия Леонидовна.
Иккис миэстэҕэ уонна 5.000 солк. сертификакка тигистилэр Мария Федотова – Нулгынэт “Биэс быраат тарбахтар” остуоруйа, Дүллүку орто оскуолатын “Дьэргэлгэн” театральнай студия о5олоро, салайааччы Иванова Александра Николаевна.
Үһүс миэстэни уонна 6.000 солк. сертификаттары икки нэһилиэк үллэһиннэ, Антуан де Сент – Экзюпери “Кыра Тыгын” Елена Слепцова-Куорсуннаах, салайааччы Степанова Наталья Матвеевна. тылбааһыгар, Дүллүкү орто оскуолатын үөрэнээччилэрэ уонна Алексей Толстой ” Буратино мүччүргэннээх сырыылара” Г.Н Чиряев аатынан Хоро орто оскуолатын “Сэһэн-тэптэл” драмкуруһуок оҕолоро, Салайааччы Назарова Анна Ефимовна.

Ону тэҥэ, анал аат ылбыт оҕолор биһирэннилэр.
Бу бырайыак сылтан сыл кэҥээн иһэриттэн тэрийэээччилэр сүрдээҕин үөрэбит. Кыттааччылар, көрөөччүлэр биһирэбилин ылан, күүс-уох эбиллэн, өссө да “Оллоонноон олорон остуоруйалыах…” көһө сылдьар фестиваль сири сибиири кэрийиэ диэн бигэ эрэллээхпит.
Тэрийээччилэр ааттарыттан барҕа махталбытын тиэрдэбит ыраах сиртэн айааннаан кэлбит кыттааччыларбытыгар, Ороһу орто оскуолатын 11 кылаас оҕолоругар, кылаас салайааччытыгар Люция Петровна Кондаковаҕа сылаас ас, утах тэрийэн, фестиваль кыттыылаахтара тото-хана аһаан сылдьыбыттарыгар.
Уонна букатыннаахтык быраһаайдаспаппыт, эһиил, ахсынньыга, Оҥхойго көрсүөххэ диэри…
Махталы, тапталы кытта, Анна Иванова